У СМІ з’явілася інфармацыя пра рэзкі рост паставак бензіна з Беларусі ў Расію, які дасягнуў гістарычнага максімуму — 141 тыс. тон за першыя 25 дзён чэрвеня. Таксама з’явіўся графік паставак бензіна за кожны месяц мінулага года.
Звяртае на сябе ўвагу, што ў цэлым экспарт нафтапрадуктаў з Беларусі ў чэрвені скараціўся ў параўнанні з маем і знаходзіцца на мінімальных значэннях з лістапада 2025 года (за выключэннем красавіка 2026 года), калі пералічыць яго на сярэднесутачныя пастаўкі. У цэлым экспарт зараз знаходзіцца прыблізна на ўзроўні чэрвеня 2025 года. Такім чынам, няма падстаў казаць пра рэзкі рост вытворчасці бензіна для расійскага рынку, а можна казаць толькі пра пераарыентацыю паставак з трэціх краін на рынак Расіі.
Такая пераарыентацыя ў дадзеных умовах эканамічна мэтазгодная. Бензін з Беларусі прадаецца ў Расіі па 127 тыс. рублёў за тону, або па $1620 за тону. У той час як бензін маркі А-95 на буйнейшых сусветных біржах у маі прадаваўся па цане каля $1100 за тону, а ў чэрвені цэны, верагодна, яшчэ знізіліся разам з цэнамі на нафту. Калі дадаць да гэтага яшчэ і мінімальныя транспартныя выдаткі, то пераарыентацыя паставак беларускага бензіна на расійскі рынак мае эканамічныя падставы і не патрабуе палітычных рашэнняў.
Разам з тым звяртае на сябе ўвагу некаторае скарачэнне агульнага экспарту бензіна з Беларусі. Прычынамі гэтага могуць быць:
- Рамонтныя работы на беларускіх НПЗ — зараз сезон рамонтных прац, і некаторыя ўстаноўкі спыняюцца на абслугоўванне.
- Рост спажывання бензіна на ўнутраным рынку — на фоне навін пра бензінавы крызіс у Расіі ў Беларусі таксама мог узнікнуць ажыятажны попыт.
- Вытворчасць па давальніцкай схеме, інфармацыя пра аб’ёмы якой можа не трапляць у апублікаваныя дадзеныя, паколькі не адбываецца змена ўласніка, і пры такім рэжыме працы вельмі вузкае кола арганізацый ці асоб валодае гэтай інфармацыяй.
Вынікі
У чэрвені пастаўкі бензіна ў Расію з Беларусі сапраўды выраслі да максімальных значэнняў. Але гэта пераарыентацыя паставак з іншых рынкаў, а не рост вытворчасці непасрэдна для забеспячэння расійскага рынку.
Эканамічная прывабнасць паставак на расійскі рынак зараз максімальная і можа сведчыць пра адсутнасць палітычнага складніка ў такіх зменах напрамкаў паставак.
Застаецца верагоднасць таго, што дадзеныя няпоўныя і не адлюстроўваюць пастаўкі нафтапрадуктаў па схеме давальніцкай перапрацоўкі.
The article is available in English Gasoline Exports to Russia (June 2026)
